كشفت الإعلامية سهام صالح عن شروط محمد الشيبي نادي بيراميدز، للتنازل عن قضيته ضد حسين الشحات، لاعب الأهلي.
وقالت سهام في تصريحات تلفزيونية: الشيبي رافض يتنازل عن الدعوى القضائية ضد الشحات، وكمان لجنة الانضباط باتحاد الكرة مش قادرة تجبر الشيبي على التنازل عن القضية.
محمد الشيبي يضع شرطان للتنازل عن قضية حسين الشحات
وتابعت: الأهلي بيضغط على اتحاد الكرة بكل الطرق عشان ينهي القضية سواء من خلال إيقاف الشيبي لانه راح للقضاء المدني.
وأكملت: وذلك بالمخالفة للايحة رغم أن الشحات اتعاقب بعد الماتش من لجنة المسابقات والانضباط.
وأردفت: اتحاد الكرة رمى الكورة في ملعب لجنة الانضباط، ولكن للأسف مفيش قدامهم حل بعد رفض الشيبي إنه يتنازل.
اقرأ أيضاً: موعد ومعلق مباراة ريال مدريد وغرناطة في الدوري الإسباني
وواصلت: الأهلي صعد للفيفا واتحاد الكرة بعت للفيفا يقولهم نعمل ايه في الموقف ده.. نتصرف إزاي؟ هو الشيبي من حقه يشتكي ولا مش من حقه؟.
وشددت: بين اتصالات وبيانات وخطابات.. مفيش أي حلول لحد دلوقتي، ويبقى الوضع على ما هو عليه، كمان النادي الأهلي تواصل مع وزير الشباب والرياضة الدكتور اشرف صبحي علشان يتدخل ويحل القصة.
اقرأ أيضاً: موعد ومعلق مباراة تشيلسي ونوتنجهام في الدوري الإنجليزي
وأشارت: الشيبي قال في تحقيقات لجنة الانضباط باتحاد الكرة أنه مغلطش في شكوى الشحات للقضاء
خصوصاً أن واقعة الضرب كانت بعد ما الماتش خلص.
وتابعت: الكاميرات سجلت الواقعة سواء الضرب أو السب والاهانة علشان كده هو رافض التنازل لأنه مخدش حقه.
وواصلت: حتى لجنة المسابقات وقعت عقوبة خفيفة على الشحات (إيقاف مباراتين).
وعن أقوال الشيبي في التحقيقات قالت: الشيبي قال في التحقيقات بالنص كدة: مباراتين ايه.. على الأقل كان اتوقف 8 مباريات مكنتش هشتكى ولا هفتح بقي.
وواصلت: بس أنا كده مخدتش حقى، وأنا حصل اعتداء عليا في مباراة السوبر بالامارات ورفضت الشكوى لأن الواقعة كانت أثناء الماتش.
شرط الشيبي لإنهاء أزمة حسين الشحات
وقالت سهام: الشيبي قال للجنة الانضباط لازم حسين يعمل فيديو اعتذار ليا ولأسرتي، لأن حتى البيان اللي نزله أنا رافضه لأنه لم يذكر أسمي.
وتابعت: لو مفيش فيديو اعتذار الماتش الجاي هضربه قلمين واشتمه زي ما شتمني واوقفوني ماتشين، ويبقى خلاص واحدة بواحدة.
وأوضحت: الأهلي بيدور على حلول سريعة للازمة، وتواصل مع المهندس هاني أبوريدة علشان يتدخل
وأبو ريدة تواصل مع فوزي لقجع عشان يقنع الشيبي بالحل الودي.
وأكملت: فعلاً حصل اتصال بين لقجع والشيبي علشان يخليه يتراجع عن شكوي الشحات ويتنازل، ولكن الشيبي قاله أنا عاوز أخد حقي.
وواصلت: على الأقل يبقى في فيديو أعتذار من اللاعب والنادي الأهلي، لأن أسرتي زعلانة جداً من اللي حصل وأني مخدتش حقي.
وأتمت: يبدو كدة إن زي ما قولتلكو القصة هتطول معانا شوية، لحد ما نشوف حل يرضي جميع الأطراف.
